Йәш ғалимдарға Рәсәй президенты гранты тапшырылды

Башҡортостандың баш федераль инспекторы Михаил Закомалдин, йәш ғалимдарҙың бер төркөмөнә Рәсәй президенты грантын тапшырҙы. Республиканан алты йәш ғалим быйыл еңеүсе, тип табылды. Уларҙың дүртәүһе – фән кандидаты булһа, икеһе – фән докторы исемен йөрөтә. Йәштәр ауыл хужалығы, техника, физика, астрономия, математика һәм механика менән ҡыҙыҡһына.Йыл һайын Рәсәй Федерацияһының фән һәм мәғариф министрлығы ике конкурс иғлан итә. Беренсеһендә – 35 йәшкәсә фән кандидаттары, икенсеһендә 40 йәшкә тиклемге – фән докторҙары ҡатнаша ала. Гранттың күләме 600 мең һумдан алып бер млн һумға тиклем етә. Гранттар артабан ғилми эштәрҙең төрлө өлкәләрендә тикшеренеүҙәр алып барыу өсөн ҡулланыласаҡ.