Сәләмәтлек сәғәтенең сираттағы ултырышында Башҡортостанда реабилитация үҙәген камиллаштырыу мәсьәләһе ҡаралды. Радий Хәбиров һуғыш ветерандарының Республика клиник госпиталендәге медицина реабилитацияһы бүлеге эшмәкәрлегенә ыңғай баһа бирҙе. Өфөлә биш йыл элек асылған үҙәктә Башҡортостандың төрлө ҡала-райондарынан йылына 2 мең кеше сәләмәтлеген тергеҙә. Нервы системаһы, терәү-хәрәкәт аппараты сирҙәрен үткәргән пациенттарҙы медицина реабилитацияһы бүлектәре, табип бүлмәләре, һыу, батҡаҡ ярҙамында дауалау бүлектәре заманса ҡорамалдар менән йыһазландырылған.
Табип һәм хеҙмәткәрҙәр алсаҡ, һөнәри яҡтан юғары квалификациялы. Республика башлығы был бүлекте ойоштороуға ҙур тырышлыҡ һалған Башҡортостандың беренсе президенты Мортаза Рәхимовҡа рәхмәтен еткерҙе. Киләсәктә реабилитация үҙәгенең эшен камиллаштырыу саралары күрелә. Һаулыҡ һаҡлау һәм ғаилә, хеҙмәт һәм халыҡты социаль яҡлау министрлыҡтары берлектә республикала реабилитация үҙәге эшмәкәрлеген камиллаштырыу буйынса комплекслы план төҙөү йөкләмәһен алды. Был йәһәттән Өфөләге һуғыш ветерандары госпитале нигеҙедә эшләгән реабилитация бүлегенең ыңғай тәжрибәһе менән Австрия республикаһының социаль реабилитация өлкәһендәге тәжрибәһе иҫәпкә алынасаҡ.
