Республикала карантин башланыу сәбәпле, хәҙер балалар менән берлектә ололарға ла өйҙәрендә ултырырға тура килә. Ваҡытты файҙалы үткәреү өсөн күптәр интернет аша онлайн-дәрестәргә яҙыла. Берәүҙәр телефон йә иһә компьютер аша китап уҡыһа, икенселәре иһә бейеү хәрәкәттәрен үҙләштерә. Интернет киңлектәрендә ултырыусылар башҡорт бейеүҙәренә ҡушылып китһен өсөн тәүҙә, әлбиттә, уларҙы дәртләндерергә кәрәк, ти Фәйзи Ғәсҡәров исемендәге халыҡ бейеүҙәре ансамбле солисткаһы Миләүшә Хәйбуллина. Әле республикала карантин башланыу сәбәпле, бейеү буйынса үткәрелгән түңәрәктәрҙе лә кисектереп торорға тура килә.
Шулай ҙа Миләүшә юғалып ҡалмай, сәнғәтте өйрәнеүселәр өсөн ул инстаграм аша бушлай онлайн-дәрес үткәрә. Онлайн-дәрескә Казань, Канада, Ҡаҙағстан, Ҡырғыҙстан, Мәскәү, Ярославль ҡалаһында йәшәүсе замандаштар ҙа ҡушыла. Улар тура эфирҙа һорауҙарын бирә, һуңынан ҡуйылған бейеүҙе интернет киңлектәрендә табып йәнә ҡабатлай ала. Әлбиттә, кешене үҙ күҙҙәрең менән күреп, бейеү өйрәтеү күпкә отошло. Уның хаталары ла шунда уҡ сағыла. Шулай ҙа интернетта ултырыусыларҙың онлайн-дәрескә ҡушылыуы карантин мәлендә ваҡыттарын буш үткәрмәүен күрһәтә, ти Миләүшә. Хәҙер бейеүҙән тыш, тағы ла тиҫтәләгән социаль әһәмиәтле ресурстарға интернет аша бушлай инеү мөмкинлеге булдырылған. Мәҫәлән,
Өфөнөң «ВДНХ-Экспо» күргәҙмәләр комплексында «Рәсәй – минең тарихым» тигән тарихи паркында ла тиҙҙән өйҙә генә ултырып сәйәхәт ҡылырға була. Мультимедиалы музей хеҙмәткәрҙәре тарихи ваҡиғаларҙы видеоға төшөрөп, социаль селтәргә һаласаҡ. Өҫтәүенә, уҡыусыларға тарих буйынса белемдәрен камиллаштырыу өсөн төрлө викториналар ҙа буласаҡ. Дөрөҫ яуап биреүсегә музей хеҙмәткәрҙәре бүләктәр әҙерләй. Үҙәк ҡала китапханаһында ла онлайн-дәрестәргә әҙерлек етди бара. Хеҙмәткәрҙәр рус һәм башҡорт телендәге ижади эштәрҙе уҡып, интернетҡа һаласаҡ. Өҫтәүенә, теләгән китапты онлайн уҡый алыу мөмкинлеге бар. Киләсәктә балалар өсөн ҡул эштәре оҫталыҡтарын да видеоға төшөрөп һалырға бурыс ҡуйған китапхана хеҙмәткәрҙәре. Әйткәндәй, әле бер нисә көн эсендә генә сайтҡа инеүселәр һаны ике тапҡырға күбәйгән. Кеше ваҡытын бушҡа үткәрмәй, тимәк онлайн-дәрестәр булдырыу урынлы.
