Бөрөнөң үҙәк майҙанын төҙөкләндереү эштәре аҙағына яҡынлаша

Балалар өсөн уйын майҙаны менән музыкаль фонтанды иһә техник асыу сараһы үтте. Бейектән был майҙан балалар конструкторын хәтерләтә. Уйынсыҡ йорттар, ҡом тауҙары, һары трактор, кран. Ҡала үҙәгендә йәйелгән төҙөкләндереү күләмен тик эшселәр аныҡ һынландыра. Был хәрәкәттәр бер-ике аҙна элек булһа, хәҙер төҙөлөш аҙағына яҡынлаша. Ихаталарҙа әлегәсә күреп күнегелгән уйын майҙансығына һис оҡшамаған балалар комплексы асыҡ. Яңы объект футуризм алымдарына нигеҙләнгән һәм экологик материалдан ҡоролған. Уйын майҙаны таусыҡ, бәүелсәктәрҙән генә тормай. Бында мауыҡтырғыс мажаралар ойошторорға мөмкин. Ҡаршы яҡта — 200 метр арауыҡта — рухи мәғрифәтселек үҙәгенең яңы бинаһы урынлашҡан. Ул милләт эштәре буйынса федераль агентлыҡтан алынған субсидия иҫәбенә бер йыл эсендә төҙөлөп бөткән. Бөрө һәм Белорет епархияһы өсөн был үҙәк йәш быуын тәрбиәләүҙең төрлө йүнәлештәрен берләштерә.Дини үҙәктең классик бинаһы менән заманса уйын майҙансығы боронғо ҡала йөҙөнә яңы һулыш бирә. Бөрөнөң уңайлы ҡала мөхите проекттары буйынса Бөтә Рәсәй конкурсында еңеү яулағанына бары бер йыл үтеүгә ҡарамаҫтан “Яңы үҙәк” архитектура-парк ансамбле әҙер тиерлек. Архитекторҙар һәм төҙөүселәр тарихи ҡаланың үҙенсәлеген дә һаҡлап ҡалған, уға замана төҫтәрен дә бирә алған. Октябрь майҙанының йөҙөк ҡашы – йырлы фонтан. Бөрөлә ул әлегә берҙән-бер.