Тиҙҙән яңы поликлиника тәүге пациенттарын ҡабул итәсәк

Ҡыуатов исемендәге республика клиник дауаханаһының яңы поликлиникаһында төҙөлөш эштәре гөрләй. Яңы медицина учреждениеһында иһә пациенттар өсөн хирургия бүлеге лә асылыр, тип көтөлә. Поликлиника пациенттарҙы ҡасан ҡабул итә башлар? Ҡыуатов исемендәге республика дауаханаһында төҙөлөш эштәре 2019 –сы йылдың аҙағында башланғайны. Яңы корпусҡа нигеҙ һалыу өсөн төҙөүселәргә ҡасандыр бында эшләп килгән ҡан тапшырыу бинаһын һүтеп, коммуникацияларҙы күсерергә тура килә. Әле иһә поликлиникаға инеү урыны әҙер. Ул пациенттар өсөн бөтә уңайлыҡтар менән төҙөлгән. Бында 30 төҙөүсе эшләй. Эшенә ҡарап, хеҙмәткәрҙәрҙең һаны артып китеүе лә ихтимал. Әле төҙөлөштөң беренсе өлөшө тамамланған. Ҡыуатов исемендәге республика клиник дауаханаһының иҫке полилиникаһы әле ғәҙәти режимда эшләй. Бында көн һайын 1200-ҙән ашыу пациент килә. Поликлиникала коридорҙар тығыҙ, баҫҡыстар иҫке, инвалидтар өсөн мөмкинлектәр юҡ.Был поликлиника 1962 йылда төҙөлгән. Йәмғеһе өс тапҡыр капиталь ремонт эшләнелгән. Мәҫәлән, 2011 йылда поликлиниканың тәҙрәләрен алыштырғандар. Хеҙмәткәрҙәр әйтеүенсә, учреждение заманса талаптарға тура килмәй. Ҡыуатов исемендәге республика клиник дауаханаһына бөтә республика халҡы мөрәжәғәт итә. Яңы төҙөлөп килгән медицина учреждениһында сменаһына мең ярым пациентты хеҙмәтләндерергә мөмкин буласаҡ. Өҫтәүенә, хирургия бүлеге эшләй башлар, тип көтөлә.Медицина учреждениеһы өсөн республика ҡаҙнаһынан 2 млрд һум аҡса бүленгән. Яңы поликлиника иҫкеһенән һигеҙ тапҡырға ҙурыраҡ буласаҡ.17 мең квадрат метр майҙанлыҡ медицина учреждениеһы 2022–се йылда әҙер булыр, тип көтөлә. Ә иҫке поликлиниканың иһә уҡыу корпусына әйләнеүе ихтимал.