Вакцинация нисек бара?

Хөкүмәттә Радий Хәбиров “Халыҡ төрлө сикләү сараларынан арыны. Әммә, коронавирус бер ҡайҙа ла китмәне”, тип белдерҙе һәм социаль учреждениелар, дауаханалар, транспортта контролде көсәйтергә ҡушты. Тикшереү менән бергә халыҡты вакцинациялау әүҙем бара. Бигерәк тә медицина хеҙмәткәрҙәрен прививкалауға ҙур иғтибар бүленә. Винарида Хәбибуллина 23 йылдан ашыу медицина өлкәһендә. Фельдшер коронавирус хаҡында ишетеп кенә белмәй. Әлегә беребеҙ ҙә сирләмәнек, ти медицина хеҙмәткәре. Әммә, киләсәктә яҡындарына һәм ауылда йәшәгән оло ата-әсәһенә йоҡтормаҫ өсөн фельдшер прививка эшләтергә йыйына. Ә Вера Родионова коронавирустан прививканың ике компонентын да эшләткән. Ошо көндәрҙә уның яҡындары ла вакцинацияларға йыйына. Шәфҡәт туташы билдәләүенсә, прививка иң беренсе үҙеңдең сәләмәтлегең өсөн кәрәк.Был аҙнала Башҡортостанға яңы партия вакцина ҡайтарылды. Дүшәмбе 8 мең 400 дозалыҡ вакцина медицина учреждениеларына таратылды. Яҡын киләсәктә Башҡортостанға тағы ла 20 мең доза вакцина килтерелә.Башҡортостан етәкселеге коронавирус менән хәлде даими күҙәтеп бара. Был аҙнала Радий Хәбиров дауахана һәм поликлиникаларҙа ғына түгел, ә башҡа социаль учреждениеларҙа, транспортта контролде көсәйтергә ҡушты.Медицина хеҙмәткәрҙәре менән бергә башҡа тармаҡ белгестәре лә коронавирустан прививка эшләтә. Уларға булышлыҡ итеү йәһәтенән вакцинациялау пункттары асыла. Өфөлә прививканы хәҙер Мега, Планета сауҙа үҙәктәрендә, Башҡортостан лайф-стайл үҙәгендә, Стәрлетамаҡта СитиМолл сауҙа үҙәгендә эшләтергә мөмкин. Шулай уҡ Башҡорт дәүләт опера һәм балет театры нигеҙендә даими мобиль пункт ойошторолған. Башҡортостанда 8 меңдән ашыу медицина хеҙмәткәре коронавирус менән сирләгән. Йәғни, уларға прививка эшләтергә кәрәкмәй. Бөгөнгә республикала 14 мең самаһы төрлө кимәлдәге медицина персоналы Ковид-19 вакцинацияланған. Йыл аҙағына тиклем төбәккә 1 миллион дозанан ашыу прививка ҡайтарылыр тип көтөлә.