Күңелдә шом, ә кеҫәлә глюкометр

Йүгереп уйнар, бейер, рәхәтләнеп урамда йөрөр урынға ҡәтғи режим, дарыуҙар, һыҙланыуҙар. Киләһе сюжет геройҙары мәрхәмәтле тамашасыларыбыҙ ярҙамына мохтаж. Иглиндән апалы ҡустылы Әлибаевтар тураһында Ләйсән Тимербулатова репортажы. Күңелдә шом, ә кеҫәлә глюкометр. Иглиндә йәшәүсе Айгөл Әлибаева инде алты йыл шулай йәшәй. Ғаиләнең һәр көнө етди тәртипкә ҡоролған. 4 йәшенә тиклем һин дә-мин сәләмәт кенә үҫеп килгән Айһылыу ҡапыл хәлен юғалта, реанимацияла уға 1-се дәрәжә диабет диагнозын ҡуя табиптар. Шул көндән алып әсә тыныслығын юғалта. Теүәл бер йылдан хәл улында — Илнарҙа ҡабатлана. Өҫтәлгә ризыҡ һайлап ҡына ҡуйыла. Бер сирҙе уртаҡ итеп йәшәгән Айһылыу һәм Илнар өсөн туҡланыу ҙа бер төрлө. Ҡандарында шәкәрҙең ҡапыл ныҡ төшөп китеүе, йә иһә, киреһенсә, күтәрелеүе әсәләрен ҡурҡытып бөткән. Айһылыу һәм Илнарҙың бер ғәмһеҙ ҡолонсаҡтар шикелле уйнаҡлап ҡына йөрөр мәлдәре. Хыялда – бейеү, спорт түңәрәктәрендә шөғөлләнеү, ә ысынбарлыҡта – тишкеләнеп бөткән бармаҡтар, ҡаты режим һәм хәлһеҙлек. Былтыр шифаханала булған саҡта глюкозаны күҙәтеү системаһын ҡулланып ҡарағайныҡ, уның менән рәхәт, тип уртаҡлаша ҡыҙ. Система ике өлөштән тора. Датчик ҡулбашҡа беркетелә һәм үҙаллы рәүештә ҡандағы глюкоза кимәлен үлсәп бара. Ә сканер датчик һаҡлаған күрһәткестәрҙе экранға сығара. Әммә был система бушлай бирелмәй. Ғаилә башлығының эш хаҡына ғына ҡарап ултырған күп балалы Әлибаевтар өсөн ул ныҡ ҡыйбат – бер йылға етерлек датчиктар менән бергә система хаҡы 325 496 һумды тәшкил итә. Айһылыу һәм Илнарға беҙҙең тамашасылар ярҙам итә ала. 5542 һанына «ДЕТИ» һүҙе менән смс ебәрергә кәрәк. Бер смс хаҡы — 75 һум. Айһылыу менән Илнар әлегә берҙәм булыуы менән сиргә ҡаршы көрәшә. Беҙҙең берҙәмлек һәм мәрхәмәтлелек уларҙың көсөн тағы ла арттырһын.