Башҡортостан Башлығы Радий Хәбиров коронавирус таралыу хәүефенә бәйле юғары әҙерлек тураһындағы указға өҫтәмәләр индерҙе.
2021 йылдың 25 октябренән 18 йәштән оло граждандар ваҡлап һатыу баҙарҙарына COVID-2019-ға ҡаршы вакциналау тураһында сертификат йәки һуңғы алты айҙа коронавирус менән ауырығанды раҫлаған белешмә күрһәтеп кенә инә ала. Был ауыл хужалығы тауарҙарын һатыусы һәм махсуслашҡан аҙыҡ-түлек баҙарҙарына ҡағылмай.
2021 йылдың 1 декабренән ошо уҡ документтарҙы шифахана-курорт ойошмаларына, профилакторийҙарына, пансионаттарға һәм ял йорттарына барғанда күрһәтеү мотлаҡ буласаҡ. Әлегә тиклем индерелгән сикләүҙәр ҙә ғәмәлдә ҡала. Сертификат-белешмәләргә ҡушып республикала йәшәүселәр вәкәләтле вазифалы шәхестәр талабы буйынса паспорт йәки шәхесте раҫлаусы башҡа документ күрһәтергә тейеш.
