Регина Хужина «Russian Beauty 2022» — Гүзәллек, мода һәм талант фестивалендә «Йәш Мисс. Рәсәй 2022» матурлыҡ конкурсында еңеү яуланы. 20 йыл дауамында үткәрелеп килгән конкурста Башҡортостан ҡыҙы тәүге тапҡыр ҡатнашты. Хәҙер ул халыҡ-ара гүзәллек конкурстарында ҡатнашыу сертификатына эйә.
Фестиваль бөйөк Пьер Кардендың тыуыуына 100 йыл тулыу айҡанлы ойошторолдо. Еңеүселәрҙе Рәсәйҙең халыҡ рәссамы Вячеслав Зайцев һәм мода тарихсыһы, «Модалы хөкөм» телевизион программаһын алып барыусы Александр Васильев бүләкләне. Матурлыҡ һәм моделдәр конкурсында ҡатнашыусылар дизайнер кейемен күрһәтеү мөмкинлеген алды. Фестивалдең бүләк фонды 1 миллион һум.
Регина Хужина — Өфөнөң Мостай Кәрим исемендәге 158-се башҡорт гимназияһы уҡыусыһы. Был Гран-при — ҡыҙҙың унынсы еңеүе. 2021 йылдың майында ул «Башҡортостан гүзәле» конкурсының балалар номинацияһында еңеүгә өлгәшкәйне, Мәскәүҙә «Miss & Mister Effulgence» халыҡ-ара матурлыҡ конкурсында «Мини мисс» исемен алғайны.
«Минең яратҡан шөғөлдәрем бик күп. Биш йәшемдән Фәйзи Ғәскәров исемендәге ансамблдең балалар бейеү студияһына йөрөйөм. Шул уҡ ваҡытта моделинг менән шөғөлләнәм, мода күрһәтеүҙә ҡатнашам, инглиз телен өйрәнәм, яҡшы уҡыйым. Быйылдан вокал һәм сәхнә телмәре дәрестәрен алам. Хатта үҙемдең йырымды яҙҙырҙым!», — ти Регина Хужина.
