Һүҙ Шишмә районындағы Торахан һәм Хөсәйен-бәк кәшәнәләре тирәһендәге административ-табыныу комплексы хаҡында.
Торахан кәшәнәһе Көньяҡ Уралда урта быуат төҙөлөш оҫталығы өлгөләренең беҙҙең быуатҡа тиклем тәү торошонда һаҡланып ҡалған берҙән-бер һәйкәле. Хөсәйен-бәк кәшәнәһе 1911 йылда яңыртып ҡоролған.
Кәшәнәләр тирәһендә административ-табыныу комплексын “Евразия дала халыҡтарының тарихи-мәҙәни үҙәге” итеп тергеҙеү тураһындағы мәсьәләне Рәсәй география йәмғиәтенең Башҡортостан бүлексәһе попечителдәр советы ултырышының көн төртибенә тәҡдим итергә йыйына. Ултырыш тиҙҙән "Торатау" геопаркында ойошторола.
Ҡарар ҡабул ителгән осраҡта Башҡортостан донъя кимәлендә танылған йәнә бер һәйкәлгә эйә буласаҡ һәм киләсәктә уны ЮНЕСКО-ның донъя мираҫы объекттары исемлегенә индереү мөмкинлеге тыуасаҡ.
