Милли кейем көнөнә Фәйзи Ғәскәров исемендәге дәүләт академия халыҡ бейеүҙәре ансамбле ойошторған күргәҙмәгә «Беләҙектәр сыңы» тигән атама бирелгән. Уны асыу тантанаһы 15 апрелдә көндөҙгө сәғәт 1-ҙә ансамбль музейында көтөлә.
Күргәҙмәлә ғәскәровсылар ансамбль репертуарындағы бейеүҙәргә биҙәүестәр коллекцияһын күрһәтә. Фәйзи Ғәскәров сәхнәгә ҡуйған биҙрә менән бейеүгә үҙенсәлекле биҙәүестәр экспозицияла айырым урынды биләй. Тамашасылар Рәсәй халыҡтарының эксклюзив костюмдары менән таныша ала. Экспозиция Рәсәй халыҡтарының Милли мираҫы йылына арнала.
Ансамбль музейында билдәле фотограф Эдуард Дилмөхәмәтовтың эштәре ҡуйыла. Күргәҙмәне асыу тантанаһында Фәйзи Ғәскәров исемендәге дәүләт академия халыҡ бейеүҙәре ансамбленең танылған артистары, шулай уҡ ансамблдең почетлы ветерандары ҡатнаша.
Музыкаль биҙәлеште Ф. Ғәскәров исемендәге дәүләт академия халыҡ бейеүҙәре ансамбле оркестры артистары тәьмин итә.
