Алданған өлөшсөләр хоҡуҡтарын тергеҙеү эшен көсәйтеү

Үткән йыл ярым ваҡыт арауығында прокуратура хеҙмәткәрҙәре төҙөлөштә өлөшләтә ҡатнашҡан граждандарҙың хоҡуҡтарын боҙоу тураһында бер меңдән ашыу осраҡ теркәгән, ялыуҙар буйынса 500 яуап хаты әҙерләнгән. Рәсәйҙең генераль прокуроры урынбаҫары Николай Шишкин өлөшләтә төҙөлөш мәсьәләләре буйынса Өфөлә кәңәшмә лә үткәрҙе.Башҡортостан Хөкүмәте Премьер-министры Андрей Назаров республикала алданған өлөшсөләрҙең мәнфәғәттәрен яҡлау йәһәтенән ойошторолған эш эҙмә-эҙлекле бара, бер нисә йыл элек төҙөлөштә өлөшләтә ҡатнашып намыҫһыҙ төҙөүселәрҙән зыян кургән кешеләрҙең һаны 10 меңдән ашыу булһа, бөгөн 7 меңдән ашыу кешегә фатир асҡыстары тапшырылған йә аҡсалата компенсация түләнгән, тип белдерҙе. Быйыл йәнә 5 йорттоң төҙөлөшөн тамамлау, киләһе йылда 12 ошондай йорт төҙөлөшө мәсьәләһен хәл итеү күҙ уңында тотола. Өлөшсөләргә аҡсалата компенсация Федераль фонд булышлығы менән түләнә. Ведомство-ара кәңәшмә ултырышында Николай Шишкин төҙөүселәрҙе, урындағы үҙидаралыҡ, дәүләт власы органдарын проблемалы объекттарҙа төҙөлөш эштәрен тамамлауға йүнәлтелгән эште көсәйтергә саҡырҙы. Граждандарҙың хоҡуҡтарын боҙоуға килтергән закон боҙоу осраҡтары буйынса һөҙөмтәле саралар күрелә. Прокурорҙар был өлкәлә закондар үтәлешен даими күҙәтеп бара.