Был сара тарихҡа ҡағылып, илебеҙҙең, халыҡтарыбыҙҙың данлы үткәнен хәтергә төшөрөү, үҙ белемеңде һынап ҡарау маҡсатын ҡуя. 45 минут дауамында ҡатнашыусылар 25 һорауға яуап бирергә тейеш. Уларға дөйөм хәрби-тарихи темаға һәм төбәк тематикаһына ҡағылышлы һорауҙар бирелә. Быйылғы «Еңеү диктанты» Бөйөк Ватан һуғышы башланыуҙың 80 йыллығына арнала, шуға күрә һорауҙарҙың бер өлөшө гитлерсыларҙың СССР-ҙың тыныс граждандарына ҡаршы енәйәттәренә арнала. Башҡортостанда диктант яҙыу өсөн 80-дән ашыу майҙансыҡ әҙерләнгән. Тестарҙы төбәктең биш юғары уҡыу йортонда, “Рәсәй – минең тарихым” тарихи паркында, “Өфө” халыҡ-ара аэропортында, мәктәптәрҙә һәм музейҙарҙа яҙасаҡтар. Хәтерегеҙгә төшөрәбеҙ, "Еңеү диктанты" акцияһында ҡатнашып юғары балл алыусыларға ВУЗға ингәндә өҫтөнлөк бирелә. Акция еңеүселәренең 9 майҙа Мәскәүҙә Еңеү парадында ҡатнашыу мөмкинлеге лә була. Акцияла ҡатнашыу өсөн диктантпобеды нөктә рф сайтында теркәлергә кәрәк.
