Учреждениеның маҡсаты – беҙҙең төбәктә таралған сирҙәрҙе, шулай уҡ нәҫелдән күскән ауырыуҙарҙы асыҡлау, анализлау һәм дауалау, һөҙөмтәле мониторинг үткәреү. Үҙәктең мөмкинлектәре менән бөгөн Башҡортостан Башлығы Рөстәм Хәмитов танышты. Хеҙмәткәрҙәр менән осрашыу барышында республикала геном медицинаһы буйынса фәнни-диагнистика үҙәк булдырыу мәсьәләһе лә күтәрелде.
Үҙәктә гендарҙы һәм организмдың үҙгәреүсәнлеген өйрәнәләр. Йәғни, кешегә ата-бабаларынан күскән сирҙәрҙе асыҡлайҙар. Был иһә ауырыуҙы алдан иҫкәртергә мөмкинлек бирә.
Бынан тыш, бында кешеләр ниндәй спорт төрөнә әүәҫ, ниндәй сирҙәргә бирешә, ниндәй ризыҡҡа аллергия бар икәнен асыҡларға мөмкин.
Учреждение медицина яғынан кешеләрҙең нәҫелен дә өйрәнә. Йәғни, балаларҙың атаһы йә әсәһе кем булған, башҡа туғандарын билдәләргә мөмкин.
Бер дарыу кешегә ярҙам итһә, икенсеһенә киреһенсә зыян килтерә. Башҡортостан башлығы был өлкәгә ентекле иғтибар бирергә ҡушты.
Осрашыуҙа билдәләнеүенсә, Европаның ҡайһы бер илдәрендә кешеләр уртаса 100 йәшкә тиклем йәшәй. Беҙҙә иһә был күрһәткес 60-70 йәш. Ошондай үҙәктәр киләсәктә кеше ғүмерен оҙонайтырға ярҙам итәсәк.
Үҙәк лабораториялары заманса ҡорамалдар менән тәьмин ителгән. Мәҫәлән, быныһы 4 сәғәт эсендә бер юлы 96 кешенең ДНК-һын анализларға мөмкинлек бирә. Ә был споттер республикала берәү генә. Ул тикшереүҙәр өсөн биочиптар етештерә.
Башҡортостан башлығы үҙәктең эшмәкәрлеген ыңғай баһаланы. Киләсәктә республикала ошондай ҙурыраҡ учреждение булдырыласаҡ.
Геном медицинаһы буйынса фәнни-диагностика үҙәген йыл ярымдан — 2017 йыл аҙағына асыу планлаштырыла. Ул Башҡортостан халҡын ғына түгел, ә Волга буйы федераль округы кешеләрен хеҙмәтләндерә аласаҡ.
