Өфөлә Рус география йәмғиәтенең төбәк бүлексәһе попечительдәр советы ултырышы үтте

Сарала совет рәйесе Радий Хәбиров ҡатнашты. Республика етәксеһе йәмғиәттең Рәсәй кимәлендә тотҡан урынын юғары баһаланы һәм төбәк бүлексәһе алдында торған мәсьәләләрҙе барланы. Асыҡланыуынса, Рус география йәмғиәтенең урындағы бүлексәһе Рәсәйҙең 10 иң яҡшы бүлексәләре исемлегендә. Ойошма федераль кимәлдәге акцияларҙа әүҙем ҡатнаша, унан тыш, үҙ проектары менән дә даими сығыш яһай. Эске туризм өсөн шарттар тыуҙырыу, яңы маршруттар асыу, урындағы бүлексәләр араһында грант конкурстарын ойоштороу, интерактив карталар төҙөү, Рус география йәмғиәте йүнәлештәре бихисап, тип белдерҙе Радий Хәбиров. Төп проект Асҡын боҙ мәмерйәһе. Күптән түгел, был тәбиғи ҡомартҡы экстремаль ялды үҙ итеүселәр өсөн генә ине, хәҙер һәр теләгән турист мәмерйә менән таныша ала. Мөмкинлектәре сикләнгән кешеләр өсөн дә Асҡын мәмерйәһе менән танышыу өсөн бөтә шарттар тыуҙырыласаҡ тип белдерелде ултырышта. Ултырыщ барышында Радий Хәбиров бер төркөм алдынғыларҙы маҡтау ҡағыҙҙары менән бүләкләне. Совет рәйесенә Рус география йәмғиәтенең иң юғары наградаһы ҙур көмөш миҙал тапшырылды. Башҡортостан бүлексәһе йәмғиәт тарихында юғары наградаға лайыҡ булған икенсе төбәк. Ҙур көмөш миҙал Валериан Альбанов исемен йөрөткән музейҙа һаҡланасаҡ.