Баймаҡ районы халҡы махсус хәрби операцияға 25-се гуманитар конвой оҙатты. Медицина белеме булған ҡатын-ҡыҙҙар инициатив төркөмө һалдаттар өсөн бинттар әҙерләгән. Район халҡы аҡса йыйып, өс мотоцикл һәм Нива автомобиле һатып алған. Шулай уҡ урындағы оҫталар ялан мунсаһы ла төҙөгән. Гуманитар йөк гигиена саралары, аҙыҡ-түлек һәм инструменттар менән тулыландырылған.
Башҡортостанда тәбиғәт ғәрәсәтенән малдар зыян күргән. Бөрйән районында һыйырҙарға йәшен атҡан. Был фотоһүрәттәр менән Ғәлиәкбәр ауылында йәшәүселәр бүлешә. Хайуандарҙы ҡотҡарыу мөмкинлеге булмаған.
Өфөләге Нижегородка биҫтәһендә ремонт башланды. Эшселәр Благовар урамында бер километрҙан ашыу юлды яңырта. Контракт буйынса бөтә эштәр ҙә сентябргә тиклем тамамланырға тейеш. Эшселәр объектты ваҡытынан алда тамамларға вәғәҙәләй. Быйылғы миҙгелдә «Хәүефһеҙ һәм сифатлы юлдар» милли проекты буйынса Өфөлә 29 километрҙан ашыу юл төҙөкләндереү ҡаралған. Бынан тыш Республика иҫәбенә тағы ла 20 км юл яңыртыла.
Бөгөндән Өфөләге “Торатау” Конгресс-Холлы янындағы туҡталҡа 3 көнгә ябыла. 8 июнгә тиклемге сикләү офтальмология буйынса «Көнсығыш — Көнбайыш» халыҡ-ара конференцияһын үткәреүгә бәйле. Баш ҡала хеҙмәттәре Өфөләрҙе һәм баш ҡала ҡунаҡтарын автомобилдәр ҡуйыу өсөн башҡа урындарҙы һайлауҙарын һорай.
Йылайыр һыуһаҡлағысына суртан селбәрәһе ебәрелгән. Бында ике йыл элек капиталь ремонт эшләнгән ине, һөҙөмтәлә һыу ятҡылығының экосистемаһы боҙолған. Уның балансын көйләү өсөн ресурстарҙы тулыландырырға хәл ителде. Селбәрәләрҙе Мәскәү өлкәһенән алып килгәндәр. 4 меңдән ашыу ваҡ суртан Йылайырҙағы һыуһаҡлағыста йорт тапты.
