Башҡортостанда алдағы көндәрҙә һауа температураһы нормаға яҡынлаша, тип хәбәр иттеләр Башгидрометтан.
«Календарь буйынса ҡыш башланғас, республикала бөтә ерҙә лә ҡар ятты, ә бына температура ҡышҡы түгел, — тип белдерҙе синоптиктар. — Йылы һауа массалары тәьҫирендә һауа температураһының норманан 5-7 градусҡа юғарыраҡ булыуы күҙәтелә. Аҙнаның икенсе яртыһында һауа шарттары үҙгәрә». Бөгөн, 5 декабрҙә, епшек ҡар яуа, боҙлауыҡ көтөлә. 6 декабрҙә һауа температураһы төндә -8, -13, аяҙытҡанда -18 градусҡаса түбәнәйә, көндөҙ — -5, -10 градусҡа тиклем һалҡын. Ял көндәрендә республикала төндә -10, -15, аяҙытҡанда -17, -22, көндөҙ -7, -12 градус һалҡын булыуы күҙаллана.
