Үҫеп килгән үҫемлектәр, бәлки, ауыл хужалығы өлкәһе вәкилдәрен ҡурҡытыр ине. Тик ғалимдарҙы түгел. Ҡороған культуралар — пландың бер өлөшөн тәшкил итә. Лаборатория шарттарында ғилми хеҙмәткәрҙәр үҫентеләрҙең үҙенсәлектәре өҫтөндә һынауҙар үткәрә. Әле генетик яҡтан үҙгәртелгән бойҙай үҫтерәләр. Был "кәрәкмәгән" гендарҙы алып ташлау, ә "файҙалы" гендарҙы, киреһенсә, индереүҙе аңлата.
Ғалимдарға ярҙам итеү өсөн булдырылған махсус климат камераларында экологияға зыян килтермәйенсә тәбиғәт күренештәрен алыштыра алған шарттар булдырыла. Экология, микроорганизмдар генетикаһы һәм үҫемлектәр биотехнологияһы мәсьәләләре "Экобиотех-2025" һигеҙенсе халыҡ-ара конференцияһында төп урынды биләй. Илдең һәм сит илдәрҙең алдынғы ғалимдары тәжрибә уртаҡлашыу һәм тармаҡтың көнүҙәк бурыстарын тикшереү өсөн йыйылды.
Радиация хәүефһеҙлеге, экология һәм биотехнология өлкәһендәге күренекле ғалим Роберт Ильязов конференцияла кешеләр араһында йод етешмәү мәсьәләһен күтәрҙе һәм уны хәл итеү юлдарын тәҡдим итте.
Ғилми конгресс ғәҙәттәгесә РӘСӘЙ ФӘНДӘР АКАДЕМИЯҺЫ ӨФӨ ФЕДЕРАЛЬ ТИКШЕРЕНЕҮ ҮҘӘГЕНЕҢ өфө биология институты нигеҙендә уҙғарыла. Быйыл симпозиум 150-нән ашыу ҡатнашыусыны йыйҙы.
Конференция ысын мәғәнәһендә фән һәм бизнес вәкилдәре араһында хеҙмәттәшлек ептәрен булдырыу өсөн яҡшы майҙансыҡҡа әүерелде. Сара шулай уҡ халыҡ-ара хеҙмәттәшлекте нығытыуға, академик фән өлкәһенә йәш белгестәрҙе йәлеп итеү өсөн ҙур этәргес булып тора.
"Экобиотех 2025" дүрт көн дауам итте. Конференция программаһына пленар сессиялар үткәреү генә түгел, ә күсмә экскурсия ла инде. Симпозиумдың һуңғы көнөндә күптән түгел юнеско-ның глобаль геопаркы статусын алған «Торатау» геопаркына экскурсия ойошторолдо.
