Йырҙар, бейеүҙәр, халыҡ костюмдары. Милли музей "Сәнғәт төнө"н шулай ҡаршылай. Бында күргәҙмәләр һәм тиҫтәләгән оҫталыҡ дәрестәре ойошторолдо. Тәмлекәстәр биҙәү, һыҙғыртҡыс йәбештереү йәки кокошниктар эшләү-һәр кем күңеленә хуш килгән шөғөл һайлай, ә иң мөһиме - барыһын да үҙ ҡулдары менән эшләй ала.
"Сәнғәт төнө” был юлы "Халыҡтар берҙәмлеге" темаһына бағышланды. Кисәне ижади мөхиттә үткәреү өсөн тотош ғаиләләр килә. Ә Нестеров исемендәге художество музейында бер зал концерт залына әйләнә. Сәнғәт институты уҡытыусылары һәм студенттары Ватан композиторҙары әҫәрҙәрен — романстар һәм операларҙан күренештәр башҡара. Музыка тынғас, рәсем төшөрөү сәнғәте. Экскурсоводтар махсус килтерелгән картиналар тураһында һөйләне. Федор Шаляпин исемендәге музейҙа кино күрһәтелә. Башҡортостандың тәүге халыҡ артисы — йырсы Һәм композитор Ғәзиз Әлмөхәмәтов тураһында документаль фильм. Шулай уҡ ҡунаҡтар «музей-театр»ҙы — биш залдағы уникаль интерактив экспозицияны күрә алды. Күҙ алдында көҙгөләр, китаптар һәм хатта тәҙрәләр йәнләнә, улар Федор Шаляпиндың тормошо тураһында һөйләй. Музейға ни бары йыл ярым ғына, ә ул баш ҡалала иң күп йөрөүселәрҙең береһе. Килеүселәр ағымы төнгә тиклем туҡтамай. Быйыл "Сәнғәт төнө" төрлө милләт вәкилдәрен берләштерҙе һәм мәҙәниәттәр берҙәмлегендә халыҡтың көсө барлығын иҫкә төшөрҙө.
