Был йола кешеләрҙә йомартлыҡ, сабырлыҡ һәм ярҙамға килергә әҙерлек үҫтерә. Матур байрамда хәбәрсебеҙ Гөлфиә Мәҡсүтова ла булып ҡайтты.
Иглин районының Ҡарамалы ауылында Шакировтар йортонда ҡаҙ өмәһенә бөтә күрше-тирә йыйылды. Сөнки, күмәкләп эшләү берләштерә, ә бер-береңә ярҙам итеү бәйләнештәрҙе нығыта, ти ауыл халҡы.Элек тә, әле лә ауылдарҙа күпләп ҡаҙ тоталар, шуға күрә беренсе ҡар менән туғандар, дуҫтар һәм күршеләр бергә йыйылып, хужаларға ҡышҡылыҡҡа ит һәм мамыҡ әҙерләргә ярҙам итә. Өмә дәртле йырҙар һәм бейеүҙәр менән үрелеп барҙы. Ихатала һәр кем үҙ эше менән мәшғүл. Тәүҙә ир-егеттәр ҡаҙҙарҙы таҙартыуға әҙерләй.
Ярҙамға килгән ҡатын-ҡыҙҙар уңай булһын өсөн мунсала урынлаша. Улар түңәрәккә ултырып эшкә тотона. Матур ҡаҙ мамығын айырым һауытҡа йыйалар, һуңынан уны мендәрҙәргә тултыралар. Хужа менән хужабикә эштең һөҙөмтәһе менән ҡәнәғәт.Ҡаҙҙарҙы таҙалап бөткәс, йылға буйына йәки ихатала йыуып һаҡларға һалалар. Эш тамамланғас хужабикә барыһын да ҙур өҫтәл артына йыя. Унда ҡаҙ итенең булыуы мотлаҡ.
