Ошо айҡанлы үткәрелгән тантаналы сарала Башҡортостан Башлығынан һәм башҡа юғары вазифалы кешеләрҙән ҡотлауҙар тапшырылды. Теманы хәбәрсебеҙ Нурия Ғилмуллина дауам итә.
Халҡыбыҙҙың бөйөк ҡомартҡыһы "Урал батыр" эпосындағы васыятҡа таянып, изгелекте яуызлыҡтан айырырға, яҡшылыҡҡа ынтылырға, белемле һәм рухлы булырға, илеңде, ереңде, халҡыңды һәм атай-әсәйеңде хөрмәт итергә өйрәтәләр башҡорт филологияһы, шәрҡиәт һәм журналистика факультетында. Туған телеңде өйрәнергә, туған мәҙәниәтеңде яратырға, тарихҡа һаҡсыл ҡарарға өйрәткән ошо бәләкәй генә изгелек утрауының хужабикәһе Гөлфирә Риф ҡыҙы Абдуллина. Гөлфирә Риф ҡыҙы – төркиәт донъяһында киң танылған ғалимә, меңәрләгән шәкерттең яратҡан остазы.
Ябай ауыл ҡыҙынан ҙур фән донъяһында үҙ һүҙен әйтер кимәлгә еткән, үҙенең фәнни мәктәбен булдырған педагог-ғалимә дәрәжәһенә тиклемге юл – ул тырышлыҡ һәм фиҙакәр хеҙмәт өлгөһө. Бөгөнгәсә ул үҙенең маҡсаттарынан баш ҡаҡмай алға бара һәм үҙе артынан тиҫтәләгән кешене әйҙәй. Профессор Абдуллина республиканың мәғариф ойошмалары менән бик тығыҙ хеҙмәттәшлек итә. 2019-сы йылдан алып төбәк-ара "Башҡорт теле һәм әҙәбиәте йыл уҡытыусыһы", 2017 йылдан алып башҡорт теле һәм әҙәбиәте буйынса төбәк-ара олимпиадала жюри ағзаһы булып эшләй, республикабыҙҙың мәғариф министрлығында Уҡытыу-методик советы ағзаһы булып тора. Башҡорт теле һәм әҙәбиәте буйынса федераль олимпиаданың Башҡортостан буйынса ойоштороусыһы ла ул.
Башҡортостандың мәғариф министры Илдар Мәүлетбирҙин килеп үҙенең ҡотлау һүҙҙәрен еткерҙе. Беҙ алып барған эштә Гөлфирә Риф ҡыҙының индергән өлөшө шаҡтай ҙур, тип билдәләне ул. Гөлфирә Абдуллинаға Башҡортостандың мәғариф отличнигы билдәһе тапшырылды. Юбиляр телсе-ғалим ғына түгел, ә киң мәғлүмәт саралары менән тығыҙ эшләгән, журналистика буйынса кадрҙар әҙерләүсе оҫта етәксе лә. Факультет студенттары республиканың алдынғы теле- һәм радиоканалдарында, матбуғат баҫмаларында тәжрибә туплай. Гөлфирә Риф ҡыҙы үҙе лә – телевидениела, радиола көтөп алынған ҡунаҡ. Уны ҡотларға тип киң мәғлүмәт саралары етәксеһе урынбаҫары Марат Ғәзизов та килгәйне.Тантаналы сараға Гөлфирә Риф ҡыҙының уҡытыусылары һәм ауылдаштары ла килде. Ғалимдың дауамы – шәкерттәрендә. Остаз бәхете – уҡыусыларының яулаған үрҙәрендә. Гөлфирә Риф ҡыҙы – тиҫтәнән ашыу фән кандидатын һәм докторын әҙерләгән ғалимә, меңәрләгән студенттарҙы белем һәм фән үрҙәренә әйҙәгән уҡытыусы ул.
