Сара сиктәрендә күтәрелгән мәсьәләләр тураһында хәбәрсебеҙ Нурия Ғилмуллина сюжеты.
КПСС-тың Башҡортостан өлкә комитетының беренсе сәркәтибе Миҙһәт Шакировтың тауышы бары һын да таң ҡалдырҙы. Уның һәм республика, ил кимәлендә билдәле булған башҡа шәхестәрҙең яҙмаларын һаҡлай «Башҡортостан» дәүләт телевидение һәм радиотапшырыуҙар компанияһының радио музейы. Ә инде радионың үҙенә килгән ҡунаҡтар Башҡортостан телевидениеһы һәм радиоһы легендаһы Наилә Ғәләүетдинова менән дә осрашты. Ул ғүмеренең 60 йылын тап ошо өлкәгә бағышлаған, бөгөн дә уға тоғро булып ҡала. Шулай уҡ ҡунаҡтар аппарат бүлмәһен ҡарап телевидение серҙәре менән танышты. Улар легендар АСБ-1 студияһын да ҙур ҡыҙыҡһыныу менән күҙәтте, уның тарихы менән танышты. Башҡортостандың Дәүләт Йыйылышы – Ҡоролтайҙың граждандар йәмғиәте институттарын үҫтереү, мәғлүмәт сәйәсәте һәм дин эштәре буйынса комитеты күсмә ултырышын «Башҡортостан» дәүләт телевидение һәм радиотапшырыуҙар компанияһында үткәреүе осраҡлы түгел. Сөнки тап был комитет менән журналистиканың бөгөнгөһө һәм киләсәге бәйле. Башҡортостанда тәүге тапҡыр хәрби журналистар тураһында закон ҡабул ителде. Сарала хәрби журналистарға бәйле тағы бер закон проекты ҡабул ителде. Ултырыш сиктәрендә мәғлүмәт сәйәсәте тикшерелде, дәүләт менән бергә тығыҙ бәйләнештә эшләү йүнәлештәре ҡаралды, һайлау кампанияһы ваҡытында төрлө сәйәси партияларҙың киң мәғлүмәт саралары менән эш итеүе ҡаралды.
