Ун ьиш йәшлек үҫмергә ҡарата бер юлы ике статья буйынса енәйәт эше ҡуҙғатылды. Бынан тыш, егеттең тәртибе тураһында белгән мәктәп хеҙмәткәрҙәре лә тикшереләсәк. Нурия Ғилмуллина репортажы.
Илдең Тәфтиш комитеты рәйесе Александр Бастрыкин енәйәт эшен тикшереүҙе шәхсән күҙәтеүгә алды. Ҡулға алынған егет әле дауаханала. Бысаҡ һәм газ баллоны менән ҡоралланған 15 йәшлек үҫмер медицина университетының ятағына килеп инә. Студенттар һәм вахтер енәйәтсене туҡтатырға маташҡанда, ул уларға бер нисә тапҡыр бысаҡ менән сәнсә. Һөжүм итеүсе бер студенттың йөҙөнә махсус шыйыҡса һибеп өлгөрә. Башҡа студенттарҙы үҙ бүлмәләренән ҡыуып сығарырға тырышып, 15 йәшлек үҫмер петарда шартлата. Һәм төрлө лозунгылар ҡысҡыра башлай.
Ғәҙәттән тыш хәл урынына хоҡуҡ һаҡлау органдары килеп етә. Ҡулға алғанда һөжүм итеүсе үҙен һәм полиция хеҙмәткәрҙәрен бысаҡ менән яралай. Һуңыраҡ тәфтишселәр тағы ла бер енәйәт эше аса. Махсус органдар үҫмерҙең тәртип боҙоуға һәләтле икәнен белә тороп та, тейешле саралар күрмәгән. Зыян күреүселәргә килгәндә, әле 5 студент Өфөнөң медицина учреждениеларында ята. Уларға кәрәкле бөтә ярҙам күрһәтелә, тип хәбәр итте һаулыҡ һаҡлау министры Айрат Рәхмәтуллин.
Һуңғы арала был үҫмерҙәр ҡатнашлығындағы икенсе ғәҙәтән тыш хәл. Яңыраҡ Өфөлә 13 йәшлек малай уйынсыҡ автомат тотоп уҡытыусыларға һәм уҡыусыларға янағайны. Был юлы инде 15 йәшлек үҫмер бысаҡ менән бер-нисә кешене яраланы.
