Йылы һәм дуҫтарса мөхиттәге осрашыуҙы хәбәрсебеҙ Гүзәл Батыраева барып күрҙе.
Мәрйәм Солтанова исемендәге ислам колледжы шәкерте, Әлмәт ҡалаһынан Әмир Закиров профессиональ футболист. Дин юлын һайлау спорт менән шөғөлләнергә ҡамасауламай, был юлға баҫыуым нисектер үҙенән үҙе килеп сыҡты, ти егет. Дингә бер кемде лә көсләп килтереп булмай. Һәр кем, үҙ ваҡыты етһә, күңеле тартылһа, асылһа, шунда ғына киләсәк. Әлеге мәлдә оло быуын вәкилдәренең генә түгел, ә йәштәрҙең, балаларҙың да иман юлын һайлауы ҡыуандыра, ти Айнур Бирғәлин.
Ураҙа тотҡандарҙы саҡырып ауыҙ астырыу — ифтар үткәреү иң изге ғәмәлдәрҙән һанала. "Ундайҙарға Аллаһ Тәғәлә сират күперен үтеүҙе еңеләйтер", – тиелә хәҙистә. "Ихлас" мәсетенең тарихы 1997 йылдан башлана.
Ошо йылда Өфө ҡалаһы етәкселеге тарафынан Мөхәммәт хәҙрәт Ғәлләм етәкләгән Киров районы мосолмандарына "Луч" кинотеатрының элекке бинаһы бирелә. Ҡыҫҡа ғына ваҡыт эсендә ярым емерек, һүтеп алынырға тейеш бина танымаҫлыҡ булып үҙгәрә. Баш ҡалаға йәм өҫтәп "Ихлас" мәсете 2001-се йылда тантаналы рәүештә асыла. Иман йортона битараф булмаған һәр кем ҡулынан килгәнсә ярҙам итә. Бында, әлбиттә, үҙ эргәһенә мосолмандарҙы, зыялыларҙы һәм эшҡыуарҙарҙы туплай алған имам-хатип Мөхәмәт хәҙрәт Ғәлләмовтың ойоштороу һәләте ҙур роль уйнай. Бөгөн бер гектарға яҡын майҙанды биләүсе, дүрт бинанан торған "Ихлас" мәсете Өфөнөң ҡабатланмаҫ биҙәгенә әүрелде. Тап ошондай күркәм саралар мосолмандарҙы берләштерүҙә, йәштәрҙе иман юлына ҡайтарыуҙа ҙур роль уйнай, ти дин әһелдәре.
