Ул "Ватанды Һаҡлаусылар" дәүләт фондының төбәк филиалы эшмәкәрлеге менән танышты. Унда Башҡортостан Башлығы менән бергә махсус хәрби операция ветерандарына адаптив автомобилдәр һәм коляскалар тапшырҙы. Тулыраҡ хәбәрсебеҙ Нурия Ғилмуллина әҙерләгән яҙмала.
Илшат Әлимғужин Мәләүез ҡалаһынан, махсус хәрби операция ветераны. 35-се мотоуҡсылар батальонында хеҙмәт итә. Тик 2024-се йылдың ахырында яу яланында ҡата яраланып ике аяғынан мәхрүм ҡала. 3 ай Силәбе өлкәһендә госпитәлдә ята. Теүәл бер йыл элек кире өйөнә әйләнеп ҡайта. Статс-сәркәтиб, Рәсәй оборона министрының урынбаҫары Анна Цивилева Өфөгә эшлекле сәфәре барышында ветерандарға һәм Илшат Салауат улына ҡулайлаштырылған автомобиль асҡыстары тапшырылды. Машина булғас хәҙер эш буйынса ла, ғаиләмде төрлө ерҙәргә алып барырға мөмкин буласаҡ, ти Илшат.«Ватанды Һаҡлаусылар» дәүләт фондының төбәк филиалы махсус операцияла ҡатнашыусыларға һәм ветерандарға, шулай уҡ уларҙың яҡындарына комплекслы ярҙам күрһәтә. Был торлаҡты яраҡлаштырыу, документтар менән ярҙам итеү һәм хәрбиҙәрҙе борсоған башҡа мәсьәләләрҙе хәл итеү. Анна Цивилева филиал эшмәкәрлеге менән ентекәп танышты, яугирҙар, шулай уҡ хәҙер фондта психологик реабилитация үткән туғандары менән аралашты. Шулай уҡ оборона министры урынбаҫары махсус хәрби операция яугирҙарының рухи остаздары — дин әһелдәре менән аралашып өлгөрҙө.
Яугирҙарҙы реабилитациялау «Ватанды Һаҡлаусылар» фондының төп бурыстарының береһе булып тора. Республикала 1000-дән ашыу инвалид хәрби хәрәкәт ветераны бар. Уларҙы адаптив кейем менән тәьмин итәләр, йәшәү өсөн уңайлы шарттар булдыралар һәм спортҡа йәлеп итеүгә булышлыҡ итәләр. Башҡортостан Башлығы менән осрашыу барышында Анна Цивилева Радий Хәбировҡа хәҙер Дондағы Ростов госпиталендә эшләгән медицина бригадаһын ойоштороуҙа ярҙам иткәне өсөн рәхмәт белдерҙе.
Статс-сәркәтиб республикала ҡатын-ҡыҙҙар хәрәкәте лә әүҙем үҫешеүен билдәләне.Шулай уҡ Өфөлә “СВОя семейная гостиная” тип аталған түңәрәк өҫтәл ойошторолдо. Унда махсус хәрби операцияла юғалғандарҙы эҙләү мәсьәләһе күтәрелде. Шулай уҡ, Башҡортостан миҫалында һәләк булған яугирҙарҙың яҡындарына психологик ярҙам күрһәтеү, дин әһелдәренең эше өйрәнелде. Башҡортостан уңыштары бөтә Рәсәй кимәлендә ҡыҙыҡһыныу уята. Был сараға төрлө министрлыҡ-ведомство, ойошма вәкилдәре, дин әһелдәре, социаль координаторҙар һәм, әлбиттә, яугирҙарҙың ата-әсәләре, ҡатындары саҡырылды. Республикала ғына ошондай 300-ҙән ашыу түңәрәк өҫтәл ойошторолған. Уларҙа махсус хәрби операцияла ҡатнашыусыларҙың төрлө һорауҙары ҡаралған. Был юлы сара федераль кимәлдә үтә, тип әйтерлек.Былтыр махсус хәрби операция ветерандарына һәм уларҙың ғаилә ағзаларына ярҙам итеү үҙәктәре селтәрен булдырыу мөһим эш йүнәлеше булып торҙо. Бөгөн улар республиканың 29 районында һәм ҡалаһында уңышлы эшләп килә. 2026 йылдың аҙағына тиклем улар республиканың барлыҡ муниципалитеттарында барлыҡҡа килергә тейеш, тип билдәләне Башҡортостан башлығы. Бынан тыш, быйыл төбәктә Башҡортостан шифаханаларында махсус хәрби операция ҡатнашыусыларын дауалауға ташлама кире ҡайтарылды. Хәҙер "Талҡаҫ" шифаханаһында яугирҙар һәм ветерандар өсөн республика реабилитация үҙәген булдырыу буйынса эш башланасаҡ.
