Халҡыбыҙ элек-электән руда сығарыу, тимер эшен яҡшы белгән. Йылдар буйына Башҡортостанда сәнәғәт тармағы үҫешә килә һәм беҙ илдә алдынғылар рәтендә. Өфөлә беренсе тапҡыр Урал металлургия тау сәнәғәте форумы уҙғарылыуы ла бушҡа түгел. Республикала донъяла булған ҡаҙылма байлыҡтарҙың бөтәһе лә бар. Сара Воскресенск баҡыр иретеү заводының 280 йыллығына арналды.
Заманса шарттарҙа сеймал һәм металлургия комплексы технологик бойондороҡһоҙлоҡ, яңынан юғалтылған сәнәғәт ҡеүәтен аяҡҡа баҫтырыу һәм яңы баҙарҙар булдырыуҙың нигеҙе булып тора. Әммә, һуңғы йылдар таусылар һәм тимерселәрҙе төрлө яҡлап һынап ҡарай. Шулай булыуға ҡарамаҫтан, тармаҡ яңы шарттарға яраҡлаша.
Республикала 20-гән тимер рудаһы ятҡылығы иҫәпләнә. Башҡортостан баҡыр запасы буйынса ла илдә алдынғы төбәк булып ҡала. Уларҙың күбеһе, билдәле булыуынса, Урал аръяғы райондарында урынлашҡан. Республикала әүҙем геологоразведка алып барыла. Уҙған йылдан ер аҫты байлыҡтарын өйрәнеү һәм табыу өсөн 57 лицензия бирелгән.
Билдәле компанияларҙың береһе Хәйбулла районында Новопетровка ятҡылығын үҙләштерә. Бында 2028 йылға баҡыр рудаһының беренсе тоннаһын табырға йыйыналар. Әбйәлил районында урынлашҡан Салауат ятҡылығы ла өйрәнелә. Киләсәктә йәш белгестәр мохтажлығын иҫәпкә алып, предприятиелар уҡыу йорттары менән хеҙмәттәшлек итә. Форумда ошондай бер-нисә килешеүгә ҡул ҡуйылды. Уҙған йылда тармаҡҡа 820 миллион һумдан ашыу дәүләт ярҙамы күрһәтелгән. Өҫтөнлөклө инвестиция проекттары сиктәрендә предприятиелар 1 миллиард ярым һумлыҡ һалым ташламаһы алған. Бер мең ярым кеше яңы эш урындары менән тәьмин ителгән. Форумда ҡатнашыусылар билдәләүенсә, беҙҙең маҡсат – илде көслө, үҙаллы һәм технологик яҡтан бойондороҡһоҙ итеү.
