Ошо уңайҙан ансамблдең балет залында тантаналы сара үтте. Фәрхәт Хәкимов данлыҡлы ансамблдә 25 йыл эшләгән. Тулыраҡ Гөлфиә Мәҡсүтова репортажында.
Артистың классика менән шөғөлләнгән урынына исем шәрифтәр яҙылған тәңкә ҡаҙау, үҙеңде ансамбль тарихына мәңгелеккә «яҙып ҡуйыуы» символын аңлатҡан матур йола. Был көн ансамбль, Башҡортостандың халыҡ артисы Фәрхәт Хәкимов хаҡлы ялға оҙата.
Бынан 25 йыл элек Учалы сәнғәт училищеһын тамамлаған 20 йәшлек егет, тәүге тапҡыр данлыҡлы ансамблдең балет залына инә. Был көндө ул әле лә тулҡынланыу менән хәтерләй.
Шулай башланып китә лә инде буласаҡ халыҡ артисының ижад юлы. Ул шунда уҡ халыҡ бейеүен сағыу һәм рухлы башҡарыуы менән айырылып тора. Ансамблдә эшләгән ваҡытында Фәрхәт Салауат улы тиҫтәләгән бейеү башҡара. Күп кенә яңғыҙ партияларҙа ла бейей. Айырыуса «Өс ағай» бейеүендә уртансы ағай партияһы, артистың талисманына әйләнә.
Шулай уҡ 2003 йылдан Фәрхәт Хәкимов — репетитор эшен дә башҡара. Ә 2021 йылдан-Башҡортостан республикаһының атҡаҙанған халыҡ ижады коллективы «Шатлыҡ» халыҡ бейеүҙәре ансамбленә етәкселек итә. Ул күп йылдар буйына йәштәрҙе бейеү сәнғәтенә өйрәтә һәм үҙенең бай тәжрибәһен тапшыра. 2012 йылда Фәрхәт Хәкимовҡа Башҡортостандың атҡаҙанған артисы, ә 2022 йылда Башҡортостандың халыҡ артисы тигән маҡтаулы исем бирелә.
Фәрхәт Хәкимовтың сағыу ижад юлын иҫкә алып, алҡыштарға күмделәр. 25 йыл элек был залға тәүгә ингән рухлы йәш егет ҙур сәхнәне, халыҡ һөйөүен яулап, бейеү залын йәштәргә тапшырып хаҡлы ялға сыға.
