«Газпром нефтехим Салауат» компанияһы ярҙамында бинаға капиталь ремонт үткәрелгән. Ә муниципаль бюджет аҡсаһына мебель һәм ҡорамалдар һатып алғандар. Үҙәктә «Ватанды һаҡлаусылар» махсус хәрби операцияла ҡатнашыусыларға ярҙам итеү дәүләт фонды филиалы, МХО ветерандары ассоциацияһы һәм һәләк булған яугирҙар ғаиләләренең Дөйөм Рәсәй йәмәғәт ойошмаһының төбәк бүлексәһе эшләй. Төбәк етәксеһе конференциялар залын, психолог һәм юрист кабинеттарын, архив, ял бүлмәләрен ҡараны. Бында шулай уҡ махсус хәрби операция ветерандары һәм Салауат тарих-тыуған яҡты өйрәнеү музейы белгестәре ойошторған музей урынлашҡан.
«Ватанды һаҡлаусылар» Дәүләт фондының социаль координаторы Сергей Данилов әйтеүенсә, элек учреждение ҡаланың мәғариф бүлеге бинаһында урынлашҡан булған, ә эш шарттары заман талаптарына яуап бирмәгән. Үҙәктә Башҡортостан Башлығы һәләк булған хәрбиҙәрҙең әсәләре менән аралашты. Радий Хәбиров, республика муниципалитеттарҙа махсус хәрби операцияла ҡатнашыусыларға һәм уларҙың ғаиләләренә ярҙам итеү үҙәктәрен булдырыуҙы дауам итә, тип билдәләне.
Радий Хәбиров Дзержинский урамындағы аллеяны төҙөкләндереү проекты менән дә танышты. Ул «Тормош өсөн инфраструктура» милли проекты һәм «Уңайлы ҡала мөхитен булдырыу» төбәк программаһы сиктәрендә тормошҡа ашырыла. Йәмәғәт киңлеге ҡаланың үҙәк өлөшөн яңыртыуҙың «Салауат: өн аралаш ете төш» берҙәм планына инә. 2024 йылда был башланғыс уңайлы ҡала мөхитен булдырыуҙың иң яҡшы проекттары Бөтә Рәсәй конкурсында еңеү яулағайны. Беренсе этапты тормошҡа ашырыуға федераль, төбәк һәм урындағы бюджеттарҙан яҡынса 180 миллион һум аҡса йүнәлтелгән.
Бынан тыш, республика башлығы «Нефтехимик» Мәҙәниәт һарайы эргәһендәге сквер биләмәһен ҡараны. Объектты төҙөкләндереүгә яҡынса 80 миллион һум аҡса бүленгән. Радий Хәбиров Салауат медицина колледжын тамамлаусыларға диплом тапшырыу тантанаһында ла ҡатнашты. Башҡортостан Башлығы сығарылыш уҡыусыларына дипломдар тапшырҙы һәм артабанғы хеҙмәт юлдарында уңыштар теләне. Быйыл Салауат медицина колледжында 255 белгес әҙерләнгән, улар «Дауалау эше», «Акушерлыҡ эше» һәм «Шәфҡәт туташы эше» һөнәрҙәре буйынса белем алған. Ә 1955 йылдан, белем биреү учреждениеһына нигеҙ һалынғандан алып, уҡыу йортон бөтәһе 12 мең кеше тамамлаған. Улар башлыса Башҡортостандың медицина ойошмаларында эшләй.
