Ауыл хужалығына космос технологиялары индерелә

Башҡортостан аграрийҙары пилотһыҙ осоусы аппараттар һәм башҡа заманса космос технологияларын һатып алыуға субсидия алыу мөмкинлегенә эйә. Ауыл хужалығы министрлығынан белдереүҙәренсә, субсидия тотонолған сумманың 50 проценты күләмендә бүленә, әммә ул 2 миллион ярымдан да артмай. Теүәл технологиялар ҡулланыу сәсеүлектәрҙең электрон картаһын төҙөргә, программа ярҙамында сәсеүгә китәсәк сығымдарҙы иҫәпләргә, үҫентеләрҙең торошон баһалап торорға, уңышты күҙалларға һәм тупраҡтың химик составын асыҡларға һәләтле.