Өфөлә енәйәтселәр ҡулға алынды

Бөгөн махсус тәғәйенләнештәге отряд хеҙмәткәрҙәре һөнәри байрамын билдәләй. Был отрядтың Росгвардия ғәскәрҙәре сафына инеүенә лә 1 йыл тулды. Бөгөн мобиль отряд махсус күнекмәләр уҙғарҙы. Бер-нисә саҡырымға йүгереү, төрлө күнекмәләр, көрәш, ауыр тимер ҡоролмалар күтәреү. Был әҙерлектең башы ғына. Артабан һәр белгес үҙ һөнәре буйынса шөғөлләнә башлай. Был күнекмәләр махсус тәғәйенләнештәге мобиль отряд хеҙмәткәрҙәренең көндәлек эше. Милли гвардия составындағы был төркөм бөгөн дә халыҡ хәүефһеҙлеге, йәмәғәт именлеге һағында. Отрядка эләгеү өсөн бер теләк кенә етмәй. Буласаҡ ОМОН хеҙмәткәре тәү сиратта физик күнекмәләр менән бергә, махсус психологик тест эшләргә тейеш. Мәҫәлән, 20 кеше араһынан 1-һе генә эләгеүе ихтимал.Һәр һалдаттың үҙ ҡоралы. Элемтә хеҙмәткәрҙәренеке телефон сымдары, саперҙарҙыҡы мина эҙләү аппараты, ә снайперҙарҙыҡы, әлбиттә, винтовка. ОМОН отряды снайперҙары әйтеүенсә, ҡорал – ул һинең икенсе тормош иптәшең кеүек. Күп ҡатлы йорттарҙа йәшенгән енәйәтселәрҙе көтмәгәндә ҡулға алыр өсөн, ОМОН саҡыртыла. Улар йорттоң ҡыйығынан кәрәкле фатирға тәҙрә аша инеп, енәйәтселәрҙе ҡулға ала. Ҡурҡыу тойғоһо күптән онотолдо, тәү сиратта, бында адреналин һәм оҫталыҡ кәрәк, ти егеттәр. Махсус тәғәйенләнештәге отрядтың һәр хеҙмәткәре үҙенең бурысын яҡшы аңлай. Улар алдарына ҡуйылған бурыстарҙы үтәргә һәр саҡ әҙер.