Башҡортостанда Халыҡтар берҙәмлеге көнөнөң байрам программаһы иғлан ителде

Байрам 2017 йылдың 4 ноябрендә көндөҙгө сәғәт 3-тә «Башҡортостан» дәүләт концерт залында уҙа. Унда милли кейемдәрҙә йөрөү, күргәҙмә һәм интерактив майҙансыҡтарҙың эше, республиканың профессиональ һәм үҙешмәкәр ижади коллективтарының концерты ҡаралған. Киске сәғәт 6-ла ҙур мәҙәни сара – «Сәнғәт төнө-2017» Бөтә Рәсәй мәҙәни акцияһы башлана. Унда музейҙар, китапханалар, клубтар, театрҙар, филармониялар һәм башҡа мәҙәниәт учреждениелары ҡатнаша. Акцияның төп темаларының береһе – Халыҡтар берҙәмлеге көнө. Мәҙәниәт һәм сәнғәт учреждениелары байрамдың тарихына, тарихта һәм хәҙерге заманда Башҡортостандың һәм Рәсәйҙең берҙәмлегенә арналған күмәк саралар тәҡдим итә.