Йәш профессионалдар

Эшселәрҙең дәрәжәһе нығына һәм һөнәрмәндәргә талаптар арта. Өфөлә Уорлдскилс Рәсәй һөнәрселек бәйгеһе дауам итә. Республика башлығы Рөстәм Хәмитов ярышсылар һәм эксперттар эшмәкәрлеге менән ҡыҙыҡһынды. Дизайн, мода, видеоетештереү, флористика. Заман технологиялары бөгөн эшселәрҙән ғәҙәти һөнәр башҡарыуҙы ғына түгел, ә ижади һәләттәрҙе талап итә. Зарина Камалова Өфө эшҡыуарлыҡ, экология һәм дизайн коллежы уҡыусыһы. Сәскәләргә бәләкәйҙән мөкиббән. Топиарий, быялаға рәсем төшөрөү – уның яратҡан шөғөлө. Киләсәктә үҙен ландшафт дизайнеры итеп күрә. Һөнәрмән өсөн тәү сиратта ижади һәләт мөһим тигән фекер менән риза.Урта махсус белем биреү йорттары заман талаптары буйынса бөгөн кәрәк һөнәр эйәләрен әҙерләргә яраҡлаша. Был йәһәттән һөнәрҙәр исемлеге даими яңыртылып тора. Төҙөлөш өлкәһе белгестәренә ихтыяж һәр саҡ юғары, ти Салауат механика-төҙөлөш коллежы вәкиле Гөлнара Исламғолова. Йәш һөнәрмән бәйгеһендә ул эксперт булараҡ ҡатнаша.Бәйгенең эшлекле программаһы сиктәрендә белгестәр һәм эшсе кадрҙар әҙерләгәндә заман стандарттары һәм алдынғы технологиялар ҡулланып ведомство-ара хеҙмәттәшлек мәсьәләләре тураһында әңгәмә үтте. Мәғариф министрлығы белгестәр әҙерләү өлкәһендә яңы партнерҙар — ВНЗМ һәм станоктар төҙөү йәмғиәттәре менән килешеүгә ҡул ҡуйҙы.Ворлдскиллс Рәсәй хәрәкәтенең яңы мөмкинлектәрен баһалап Республика башлығы Рөстәм Хәмитов төбәк бәйгеһе илдә эшсе һөнәрҙәр дәрәжәһен нығыта, тип билдәләне. Йылдан-йыл чемпионаттың һөнәрҙәр исемлеге киңәйә. Былтыр улар 23 булһа, быйыл 37 төрлө. Төбәк бәйгеһе иһә республика ғына түгел, Мәскәү, Ярославль, Свердловск өлкәләре һәм Татарстан республикаһы һөнәрмәндәре өсөн дә асыҡ.Йәш һөнәрмәндәрҙең төбәк чемпионаты 12 февралгә тиклем бара. Ошо уҡ ваҡытта ата-әсә һәм һөнәр һайлау алдында торған уҡыусылар өсөн даими экскурсиялар ойошторола.