Күҙгә төшкән сүп кеүек

Өфөлә йәшәүсе Адель Башарова хирургтар менән судлашырға мәжбүр. Күҙҙәре насар күреү сәбәпле, ул офтальмологтарға мөрәжәғәт итеп, лазер операцияһын эшләтә. Әммә операциянан һуң, ул күҙенең эсендә салфетканың ебе тороп ҡалыуын күрә. Адель Башарованың күҙҙәре бәләкәй сағынан уҡ насар күргән. Дүрт йыл элек ул баш ҡалалағы шәхси клиникала күҙҙәренә лазер операцияһын эшләргә бара. Операциянан һуң күҙлек тураһында ул бөтөнләй онота, әммә бер проблеманан ҡотолоп, ул икенсеһенә юлыға. Адель Башарова һүҙҙәренсә, хирургтар операция ваҡытында һул яҡ күҙендә салфетканың ебен ҡалдырған. Пациенттың күҙендә ҡалған еп видео аша аныҡ күренә. Башҡа клиника табиптары ла уны хирург операция ваҡытында ҡалдырған, тип иҫәпләй. Әммә пациенттың күҙендәге еп видео аша күренһә лә, башҡа белгестәр быны иҫбатлаһа ла, шәхси клиника табиптары ни өсөндөр үҙҙәренең хатаһын танымай. Табиптар менән уртаҡ тел табып булмағас, Адель Башарова судҡа мөрәжәғәт итә. Суд алдынан үткәрелгән экспертиза ла күҙҙәге еп операция ваҡытында ҡалыуын иҫбатланы. Әммә шәхси клиника хеҙмәткәрҙәре пациенттың күҙен ҡабаттан тикшерергә һәм яңынан экспертиза үткәререү теләген белдерҙе. Бындай тәҡдим Адель Башарованы ла, уның адвокатын да аптырашта ҡалдырҙы. Һөҙөмтәлә судья уртаҡ килешеүгә килергә һәм уйлау ваҡытын биреп, суд барышын икенсе көнгә күсерҙе. Ә Адель Башароваға иһә хәҙер күҙҙә тороп ҡалған епте алыу өсөн йәнә операция эшләтергә тура киләсәк.