Башҡортостанда күп балалы ғаиләләр бушлай бирелә торған ер участкаһы урынына 250 мең һум аҡса аласаҡ. Кемгә тейешле? Нисек юлларға? Ҡайҙа мөрәжәғәт итергә?
Льготалы ер участкаларының етешмәүе Башҡортостанға ғына түгел, илдең күпселек төбәктәренә хас. Хәл бигерәк тә ҡалаларҙа киҫкен. Сиратта тороусылар көндән-көн арта, ә муниципалитеттың участка булдырырлыҡ ерҙәре етешмәй. Башҡортостанда мәсьәләне төрлөсә хәл итеп ҡаранылар. Мәҫәлән Өфөлә сиратта торғандарға участкалар күрше Өфө, Ҡырмыҫҡалы, Кушнаренко һәм башҡа райондарҙа тәҡдим ителде. Был да проблеманы хәл итмәне.
Быйылдан ер урынына 250 мең һум аҡса биреү тәҡдиме ғәмәлгә инде. Был проект сентябрҙә эш башлаясаҡ. Әммә ғаризалар ҡабул итеү күптән башланған.
Түләүгә кемдәр дәғүә итә ала, уны нимәгә тотонорға мөмкин? Һорауҙарға Башҡортостандың ер һәм мөлкәт мөнәсәбәттәре министры урынбаҫары Рөстәм Ғизәтуллин яуап бирә.
