Башҡортостандың иң оло уҡыу йорттарының береһе — Өфө сәнғәт училищеһына быйыл йөҙ йәш тула. Ошо дәүерҙә ул йөҙәрләгән белгес әҙерләп сығарҙы, уларҙың күбеһен хәҙер милли сәнғәтебеҙҙең йөҙөк ҡашы тип атайҙар. Улар араһында — танылған композиторҙар, йырсылар, музыканттар, музыка учреждениеларының етәкселәре бар. Республика район закимиәттәренең мәҙәниәт бүлектәрендә лә эшләй училище тамамлаған һәләтле, рухлы йәштәр.
Йәштәрҙә милли рух тәрбиәләүсе, музыка сәнғәтенә һөйөү күндереүсе бүлектәрҙең береһе — Рәсәй халыҡтарының уйын ҡоралдары бүлеге лә 30 йәшен билдәләй. Студияла ошо бүлектең уҡытыусылары — думбырасы Гүзәл Үмәргалина һәм дирижер Дамир Әбүбәкиров менән әңгәмәләшәбеҙ.
