Юлдың ниндәй өлөштәре беренсе сиратта иғтибар талап итә һәм быйыл баш ҡалала төп ремонт эштәре нисек ойоштороласаҡ был? Башҡала юлдарынан хәбәрсебеҙ Гүзәл Батыраева үтте.
Был күләүек аҫтында ысын тоҙаҡ йәшеренгән. Һыу ҡаплаған соҡорға эләгеп, бамперҙың ватылыуының сәбәбе асыҡлана. Соҡорҙоң тәрәнлеге хатта Дәүләт автоинспекцияһы хеҙмәткәрҙәрен дә аптырашта ҡалдыра. Күрелгән саралар һөҙөмтәһендә юлдағы соҡорҙо ваҡытлыса ғына ҡаплап китәләр.
Металсылар урамындағы юл емерелеүен дауам итә. Затон биҫтәһендәге урамдарҙың береһендә юл ер аҫтына киткән, икенсеһендә водителдәргә тәрән күләүектәр аша үтергә тура килә. Һыу аҫтында "йәшеренгән" ҡаршылыҡтарға эләгеп водителдәр машиналарына зыян килтереүҙе дауам итә. Яҙ авариялар ҙа тап ошо саоҡорҙар арҡаһында арта. Водителдәр юл ҡағиҙәһен боҙоп уны урап үтергә мәжбүр. Водителдәр үҙҙәренең һәм пассажирҙарының ғүмерен ҡурҡыныс аҫтына ҡуя. Тәгәрмәстәрен яматырға теләүселәрҙең һаны көндән көн арта. Бер урындағы соҡорға эләгеп зыян күреүселәр бигерәк тә күп, тиҙәр сервистарҙа.
Өфөнөң башҡа райондарында ла хәл яҡшы түгел. Сипайловолағы үҙәк урам күптән ремонт көтә. Маршал Жуков урамындағы иҫке асфальтты былтыр уҡ алып ташлайҙар, ә яңыһын әле һаман түшәмәгәндәр. Өфөләрҙе Дим шоссеһының аяныслы торошо ла борсой. Бында соҡорҙо һәр бер нисә метр һайын осратырға мөмкин. Әйткәндәй, тәгәрмәстәре тишелгән машиналар ҙа теҙелешеп ултыра. Күрелгән зыянды кем ҡаплар, тигән һорау бирә улар.
Быйыл яҙ юлдарҙың торошо ҡәнәғәтләнерлек түгел-тип зарлана водителдәр.Ҡаланың төп юл артериялары ла Өфө тәбиғәтенең үҙенсәлектәренә сыҙамай. Камераның тотороҡлолоғо арҡаһында видео юл япмаһының бөтә „матурлығын„ күрһәтмәй, әммә өфө водителдәре соҡор аша һикереүҙең нимә икәнен яҡшы белә. Халыҡты борсоған был мәсьәлә тураһында юл хеҙмәттәре белә һәм күптән инде соҡорҙарҙы ремонтлай башлаған. Мәҫәлән, Дим районынан ебәргән кадрҙар. Бындай саралар хәҙер бөтә республикала үтә.
Ҡала хакимиәтендә билдәләүҙәренсә, соҡорҙарҙы ремонтлау — юлдарҙағы аварияларҙы бөтөрөүгә йүнәлтелгән ваҡытлыса һәм мәжбүри сара.
Өфө юлдарындағы етешһеҙлектәр тураһында ҡала хакимиәте сайтында хәбәр итә алаһығыҙ.
