Гидроэлектростанцияның яҙғы осорҙағы эшмәкәрлеге тураһында хәбәрсебеҙ Гөлфиә Мәҡсүтова репортажы.
Башҡортостандың иң ҙур гидроҡоролмаһында быйыл ташҡын иртә башланған. Ул 31 мартта уҡ ташҡын режимында күскән. Яҙҙың үтә иртә башланыуына ҡарамаҫтан, гидроэлектростанция ҙур һыуҙы тулы әҙерлек менән ҡаршы ала. Яҙғы ташҡын мәлендә ҡорамалдарҙың ышаныслы һәм һөҙөмтәле эшләүе өсөн Башҡортостандың генерация компанияһы һәм подряд ойошмалары иҫкәртеү саралары комплексын үтәй.
Быйылғы ташҡындың иң юғары нөктәһе үткән. Павловка һыуһаҡлағысында максималь һыу ағымы 11 апрельгә тура килә һәм секундына 2740 кубометр тәшкил итә. Был күп йыллыҡ уртаса күрһәткестән түбәнерәк, ғәҙәттә, ул секундына 2 мең 740 кубометрға етә. Әле ГЭС-та бөтә дүрт гидроагрегат та эшләй. Уларҙың дөйөм көсө яҡынса 170 мегаватт самаһы.Ҡышҡы һыу аҙ булған осорҙа һәм яҙғы ташҡынды үткәреүгә әҙерлек барышында энергетиктар гидроузелды ташҡын алды кимәленә тиклем бушата.
Апрель-май айҙарында ташҡын һыуҙарының бер өлөшөн туплау иҫәбенә һыуһаҡлағыстың ирекле һыйҙырылышлығы Балтик бейеклек системаһы буйынса тейешле кимәлгә еткерелә. Павловка һыуһаҡлағысы Ҡариҙел йылғаһында ташҡындың иң юғары нөктәһен имен үткәрергә ярҙам итә һәм ҙур биләмәләрҙе һыу баҫыу хәүефен кәметә. Йыйылған һыу запасы киләһе яҙға тиклем яйлап тотонола. Шулай итеп, Павловка һыуһаҡлағысы аҙ һыулы йәйге-көҙгө һәм ҡышҡы осорҙа Ҡариҙел йылғаһы кимәлен һаҡлай.
Гидроэлекторстанцияның йөрәге тулыһынса тейерлек һыу эсендә урынлашҡан. Станцияла ҙур булмаған коллектив эшләй һуңғы 20 йылда процесты автоматлаштырыу үткәрелә, күп кенә процестар компьютер аша идара ителә. Тап ошонда бөтә процесстар барышы күҙәтелә. Һыу тәрәнлеге, быуаның артымы, ағым тиҙлеге-бөтәһе лә мониторҙа. Бында тәүлек әйләнәһе оператив хеҙмәт эшләй. Республикала яҙғы ташҡындың иң юғары нөктәһе үтте, һыу кимәле түбәнәйә. Алдағы көндәрҙә ГЭС ташҡын һыуҙарын ағыҙыу эштәрен туҡтата. Бынан һуң гидроузел ғәҙәти режимға ҡайта һәм һыуҙы йыл дауамында — киләһе ташҡынға тиклем тигеҙ тотоноу өсөн туплай башлай.
