Бала саҡта беҙ "Аҡбуҙат" журналын ҡарап, әкиәттәрен, һүрәттәрен яратып ҡарай инек. Артабан "Йәншишмә"не алдырып, йотлоғоп уҡыныҡ. Һуңынан башҡорт балалары үҫмергә әйләнеп "Аманат"ты уҡыр ҙа, өлкән йәштәгеләр өсөн сығарылған гәзит-журналдарға күсер ине.
Гәзит, журнал, китап – Совет заманында һәр кемгә дуҫ, серҙәш, кәңәшсе булған. Хәҙер шул заманалар ҡайтмаһа ла, китап ҡәҙере, матбуғат көсө тергеҙелеп, нығынһын ине. Электрон варианттамы, тактиль рәүештә тотоп-тойоп булһынмы, тере булһын ул!
Балалар матбуғатының "уртансы" улы – "Йәншишмә" гәзитенең эшмәкәрлеге, яныуҙары, ижады, йәш хәбәрселәр менән тығыҙ бәйләнеше тураһында студия ҡунаҡтары – гәзиттең баш мөхәррире, Башҡортостандың атҡаҙанған матбуғат һәм киң мәғлүмәт саралары хеҙмәткәре Мирсәйет Юнысов һәм "Йәншишмә" гәзитенең йәш хәбәрселәр "мәктәбен" тамамлаған Зарина Бағышаева һөйләне.
