Тәүлектең яҡты мәлендә мосолмандарға ризыҡ менән һыуҙан, енси мөнәсәбәттәрҙән тыйылып тороу фарыз. Билдәләнгән ваҡыт кеше өсөн хас булған тойғоларҙан баш тартыу ғына түгел, ә мәңгелек ҡиммәтәр тураһында ла уйланырға бирелә. Рамаҙан айы Ураҙа ғәйете менән тамамлана. Быйыл ул марттың ун туғыҙына тура киләсәк. Хәбәрсебеҙ Гөлфиә Мәҡсүтова сюжеты.
Сәйғәфәрофтар ғаиләһе Ураҙаны көтөп ала. Изге Рамаҙан айы башланыуын улар ҙур өҫтәл янында дуҫтары, туғандары менән ҡаршылай. Ата-әсәһенә эйәреп 11 йәшлек Саида һәм 8 йәшлек Умар ҙа ураҙа тоторға ниәтләй. Рамаҙан айы донъялағы миллионлаған мосолман өсөн рухи яңырыу, ураҙа тотоу һәм ғәҙәти тормоштағы ҡиммәттәрҙе яңынан ҡарап сығыу осоро. Бер ай дауамында көндөҙгө сәғәттәрҙә ашауҙан һәм һыуҙан баш тартыу, күберәк доға ҡылыу, хәйриә эшмәкәрлеге менән шөғөлләнеү һәм эске торошоңа иғтибар итеү-был айҙың төп мәғәнәһе шулай. Ураҙа тотоу бәлиғ булған һәм сәләмәт мосолмандар өсөн мотлаҡ. Унан йөклө һәм имеҙгән ҡатын-ҡыҙҙар, ауырыуҙар, оло йәштәгеләр, сәйәхәтселәр һәм күрем ваҡытында ҡатын-ҡыҙҙар ғына азат ителә. Әгәр ураҙа ваҡытында бер көндә тыйыуҙы боҙорға тура килһә, уны һуңыраҡ тулыландыралар. Ураҙала байрам намаҙы алдынан мосолмандарға фитр-саҙаҡа түләргә кәрәк. Был хәйер-саҙаҡаның мәғәнәһе — Рамаҙан айында ҡылынған ваҡ гонаһтарҙан ғәфү итеү.
Ураҙа байрамы 2026 йылдың 20 мартта билдәләнәсәк. Был көндө мосолмандар мәсеттәрҙә байрам намаҙы уҡый. Шулай уҡ ваҡытын туғандары менән аралашыуға, ғаилә бәйләнештәрен нығытыуға, мохтаждарға ярҙам итеүгә һәм башҡа изге эштәр башҡарыуға бағышларға кәңәш ителә.
